Ислом Каримов номидаги “Тошкент” халқаро аэропортида келиш залини кенг кўламли реконструкция қилишнинг биринчи босқичи якунланди, дея хабар берди “Uzbekistan Airports” матбуот хизмати.
Терминалнинг янгиланган ўнг қисми аллақачон фойдаланишга топширилган: келиш зали кенгайтирилган, автотранспорт ва автобуслар учун янги кириш йўлаги қурилган, 120 ўринли автотураргоҳ ташкил этилган, шунингдек, яшил ҳудуд яратилган.
Келиш залининг майдони бино фасадининг кенгайтирилиши ҳисобига 2100 квадрат метрга оширилди. Божхона зонаси кенгайтирилди, қўшимча багаж лентаси ўрнатилди. Илк бор терминал ичида кутиб олувчилар учун зона яратилди, у ерда 120 киши учун ўтириш жойлари ҳам мавжуд.
Келиш залига қисқа муддатли кириш жойи очилди. Энди у ерга такси, шахсий автомобиллар ва автобусларда 10 дақиқагача рухсат этилган тўхташ билан етиб бориш мумкин – худди жўнаш зонасига ўхшаб.
“Терминалнинг ўнг қисмини кенгайтириш ишлари якунланди. Эртагаёқ чап қисмини реконструкция қилиш бошланади. Биз босқичма-босқич ёндашувни танладик, чунки аэропорт фаолиятини тўхтатиш имкониятимиз йўқ эди. Ноябрдан июнгача, об-ҳаво шароитлари ва йўловчилар оқимининг юқорилигига (кунига 200 тагача рейс) қарамай, қурилиш узлуксиз олиб борилди”, — дея маълум қилди “Uzbekistan Airports” қурилиш бўлими.
Реконструкциянинг иккинчи босқичини 2025 йил охиригача якунлаш режалаштирилган. Қўшимча багаж бериш лентаси ўрнатилади, кутиб олувчилар зонаси кенгайтирилади – у ерда кафе, дўконлар ва хизмат кўрсатиш шохобчалари жойлашади.
2024 йил август ойида реконструкциядан сўнг жўнаш зали очилган эди. Бино деворлардан халос бўлди, энди унга ҳам машинада кириш мумкин. Йўловчилар ва кузатувчилар учун катта зал пайдо бўлди.
Якуний босқичда келиш ва жўнаш заллари ягона терминал комплексига бирлаштирилади. Унинг умумий майдони 10 минг квадрат метрдан ошади, ўтказиш қобилияти эса соатига 2400 йўловчигача ўсади.
“Uzbekistan Airports” йўловчилардан вақтинчалик ноқулайликлар учун узр сўради ва тушунганликлари учун миннатдорчилик билдирди.
