Аброр Қодирович Турғунов «Пойтахт банк» раиси вазифасини бажарувчи этиб тасдиқланди. Молия ташкилоти акциядорларининг қарори 2025 йил 28 август куни Ягона корпоратив ахборот порталида эълон қилинди.
У 1983 йилда Тошкентда туғилган. 2005 йилда Тошкент давлат иқтисодиёт университетини «Маркетинг» мутахассислиги бўйича, 2013 йилда эса Банк-молия академиясини «Инвестицияларни бошқариш» йўналиши бўйича тамомлаган. 2024 йил июнидан Турғунов «Пойтахт банк» раиси ўринбосари вазифасини бажарувчи лавозимида ишлаб келган. Бу лавозимда у чакана кредитлаш, хазиначилик, иқтисодий таҳлил ва стратегик ривожланиш, ташқи иқтисодий фаолият, умумий бўлим ва харидлар бўлимига масъул бўлган.
Кадрлар ўзгаришининг сабаблари
Раҳбарият ўзгариши банкнинг ўша пайтдаги раҳбари вазифасини бажарувчи Дўстбой Абжалов билан юз берган ҳодисадан тахминан бир ой ўтгач содир бўлди.
29 июль куни Савдо-саноат палатаси томонидан ташкил этилган очиқ мулоқот чоғида у ўзини «Пойтахт банк» бошқаруви раиси сифатида таништириб, савол беришни бошлаган. Марказий банк раисининг биринчи ўринбосари Нодирбек Сайдуллаев уни тўхтатиб, тайинлов Марказий банк томонидан тасдиқланмагани учун Абжалов фақатгина раҳбар вазифасини бажарувчи эканини аниқлаштирган.
Бошқа қарорлар
Акциядорлар қарорига кўра, «Пойтахт банк» номинал қиймати 1000 сўм бўлган 400 млн дона оддий акцияни умумий қиймати 400 млрд сўмга жойлаштиради. Уларни ягона акциядор — БААнинг Bond Investment Limited компанияси ёпиқ обуна орқали сотиб олади.
Ягона давлат реестрига кўра, «Пойтахт банк» устав капитали 100 млрд сўмни ташкил қилади. 2025 йилдан бошлаб банклар учун минимал устав капитали камида 500 млрд сўмни ташкил этиши керак.
Банкни хусусийлаштириш
«Пойтахт банк» акциядорлик-тижорат уй-жой қурилиш-жамғарма банки 2018 йил охирида ўз фаолиятини бошлаган. Унинг асосий вазифалари сифатида аҳоли ва юридик шахсларни ипотека кредитлари ва уй-жойга бўлган эҳтиёжларини қондириш учун банк хизматлари, шунингдек, арзон кўп қаватли уйлар қурувчи пудрат ташкилотларига кредитлар бериш белгиланган эди. Банк 2021 йил май ойида сотувга қўйилган.
2024 йил октябрь ойида БААнинг Bond Investments компанияси «Пойтахт банк» акцияларининг 100% эгасига айланди. Давлат активларини бошқариш агентлиги ушбу инвестор билан банкни 10 млн долларга сотиш бўйича келишувга эришилганини маълум қилган эди.
Spot нашрининг ёзишича, Bond Investments Limited’нинг ўз сайти йўқ. ДАБА инвестор Das Holding таркибига киришини даъво қилса-да, бу борада очиқ маълумот топишнинг иложи бўлмади.
2024 йили 25 июль куни Марказий банкнинг собиқ раиси Мамаризо Нурмуратов «Пойтахт банк»ни сотиш бўйича битимни маъқуллаш ниятида эканини айтган эди. БАА холдингини ўргангач, регулятор потенциал инвестор талабларга жавоб беради, деган хулосага келган, дея таъкидлаган.
