Ўзбекистон миллий терма жамоаси ярим ҳимоячиси Аббосбек Файзуллаев Туркиянинг «Истанбул Башакшехир» клуби ўйинчисига айланди. Ушбу трансферни клуб матбуот хизмати тасдиқлади.
«Файзуллаевни оиламизга хуш келибсан деймиз ва унга тўқ сариқ-кўк либосда муваффақиятлар тилаймиз», — дейилади клуб аккаунтида.
21 ёшли футболчи Истанбул клуби билан 5 йиллик шартнома имзолади. Трансфер нархи бир марталик тўлов билан тахминан 7,5 миллион еврога баҳоланмоқда.
Футбол эксперти Алишер Никимбаевнинг сўзларига кўра, «Пахтакор» сотувдан тушган фоиз эвазига 1 миллион евро атрофида маблағ олиши мумкин.
Аббос Файзуллаев — Тошкентнинг «Пахтакор» клуби тарбияланувчиси, 2022 йилда Ўзбекистонда энг яхши ёш футболчи деб топилган. 2023 йил март ойида U-20 ёшлар терма жамоаси билан бирга Осиё Кубоги ғолиби бўлган ва турнирнинг энг яхши футболчиси деб ҳам эътироф этилган.
2023 йил август ойида у «Пахтакор»дан Россиянинг ЦСКА клубига 500 минг евро эвазига ўтган эди. 2023 йилда у дунёнинг энг яхши ёш футболчиси номзодлари қаторига киритилган.
2024 йилда Файзуллаев Осиё Футбол Конфедерацияси томонидан Осиёнинг энг яхши ёш эркак футболчиси, шунингдек, Ўзбекистоннинг энг яхши футболчиси деб тан олинган.
Аввалроқ «Башакшехир» Ўзбекистондан яна бир футболчи — Элдор Шомуродов билан ҳам шартнома имзолаган эди.
2025 йилда Аббосбек Файзуллаев миллий терма жамоанинг жаҳон чемпионатига тарихий чиқишидан сўнг «Ўзбекистон ифтихори» фахрий унвони билан тақдирланди.
