Ўзбекистон Конституцияси қабул қилинганининг 33 йиллиги муносабати билан Президент Шавкат Мирзиёев «Содир этган жиноятига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида»ги Фармонни имзолади. Бу ҳақда давлат раҳбари матбуот хизмати хабар берди.
Ҳужжат билан жиноят содир этган, қилмишидан чин кўнгилдан пушаймон бўлган ва тузалиш йўлига қатъий ўтган 615 нафар шахс афв этилди.
Афв этилганлардан 220 нафари асосий жазодан тўлиқ озод этилди, 123 нафари жазони ўташдан муддатидан илгари шартли равишда озод қилинди, 97 кишига тайинланган жазо енгилроғига алмаштирилди. Бундан ташқари, 175 кишига тайинланган озодликдан маҳрум қилиш жазоси муддати қисқартирилди.
Афв этилганлар орасида 9 нафар хорижий давлат фуқароси, 29 нафар аёл, 60 ёшдан ошган 23 нафар эркак, 30 ёшгача бўлган 264 нафар (улардан 2 нафари вояга етмаган) ҳамда тақиқланган ташкилотлар фаолиятида иштирок этган 9 киши бор.
Масъул вазирлик ва идораларга афв этилганларни оиласи ва яқинлари бағрига қайтариш, уларга ижтимоий мослашиш, фойдали меҳнатга жалб қилиш, соғлом турмуш тарзини йўлга қўйиш ва жамиятда муносиб ўрин эгаллашига кўмаклашиш бўйича топшириқлар берилди, дейилади хабарда.
