Беш миллион сунъий интеллект лидери лойиҳасини амалга ошириш тартиби Вазирлар Маҳкамасининг 2025 йил 31 декабрдаги қарори билан белгиланди.
Эслатиб ўтамиз, Ўзбекистон ушбу лойиҳани Бирлашган Араб Амирликлари билан ҳамкорликда декабрь ойида ишга туширган эди. Маросимда президент Шавкат Мирзиёев ва БАА ҳукумат ишлари бўйича вазири Муҳаммад бин Абдуллоҳ ал-Гергави иштирок этди.
Лойиҳа «Бир миллион дастурчи» ташаббусининг давоми бўлади. 2026 йилда 500 минг кишини, 2035 йилгача эса жами 5 миллион кишини ўқитиш режалаштирилган.
Лойиҳа доирасида ҳар йили энг юқори натижаларга эришган иштирокчилар ўртасида миллий танлов ўтказилади:
- 100 нафар ўқитувчи 1000 доллар эквивалентидаги пул мукофотларини олади;
- 10 нафар ўқитувчи — хорижий туристик саёҳатлар;
- 500 нафар ёшлар — ноутбуклар;
- 500 нафар ёшлар — қимматбаҳо совғалар;
- 3 та олий таълим муассасаси — пул мукофотлари;
- 2 та умумтаълим мактаби — электромобиль кўринишидаги «Президент совғаси».
Лойиҳани мувофиқлаштириш учун махсус комиссия тасдиқланди, у ҳудудий мақсадли кўрсаткичларни белгилайди, ташаббуснинг жойларда амалга оширилишини назорат қилади, иштирокчиларни баҳолаш тартибини тасдиқлайди ва тақдирлаш тўғрисида қарор қабул қилади.
Унинг таркибига рақамли технологиялар вазири раислигида етти нафар вакил, шунингдек, мактабгача ва мактаб таълими, олий таълим, фан ва инновациялар вазирлари ўринбосарлари, IT-таълим ассоциацияси раиси ва Рақамли таълим технологияларини ривожлантириш маркази директори кирди.
«Муҳаммад ал-Хоразмий ворислари» лойиҳаси Қорақалпоғистон ва вилоят марказларида кенгайтирилади. У қуйидагиларни назарда тутади:
- замонавий касбларга (IT бўйича проджект-менежер, стартап-лойиҳалар менежери) ва чет тилларига бепул ўқитиш;
- халқаро профессионал IT-сертификатларини олиш учун бепул курслар;
- информатика, робототехника, киберспорт ва бошқа йўналишлар бўйича мусобақаларда иштирок этиш.
