Ўзбекистонда 2026–2030 йилларга мўлжалланган «Тоза ҳаво» умуммиллий лойиҳаси йўлга қўйилади. Тегишли фармон 2026 йил 25 март куни президент томонидан имзоланди.
Ҳужжатда қуйидаги мақсадлар кўзда тутилган:
- атмосферага ифлослантирувчи моддалар чиқарилиши ҳажмини 10,5 фоизга камайтириш;
- атроф-муҳитга таъсир кўрсатишнинг 1 ва 2-тоифаларига мансуб корхоналарда автоматик мониторинг станциялари ҳамда чанг-газ тозалаш ускуналарини ўрнатиш;
- саноат объектлари чиқиндиларини ушлаб қолиш улушини 32 фоизга етказиш;
- РМ2,5 кўрсаткичи бўйича миллий нормативлардан юқори бўлган кунлар сонини камайтириш;
- транспорт воситалари томонидан атмосфера ҳавосига чиқариладиган ифлослантирувчи моддалар ҳажмини 10 фоизга камайтириш.
«Тоза ҳаво» лойиҳасини ҳудудлар кесимида амалга ошириш босқичма-босқич амалга оширилади. Биринчи навбатда чора-тадбирлар Фарғона водийсида жорий этилади, сўнгра марказий вилоятларда, ундан кейин эса мамлакатнинг жанубий ва ғарбий қисмларида татбиқ қилинади. Якуний босқич Қорақалпоғистон ва Хоразмни қамраб олади.
Фармон билан ушбу лойиҳани Тошкент шаҳрида амалга ошириш дастури алоҳида тасдиқланди. Унда энергетика, саноат ва қурилиш соҳаларидан чиқадиган чиқиндиларни камайтириш бўйича чора-тадбирлар мажмуи, шунингдек, табиий чангни назорат қилиш чоралари кўзда тутилган.