2026 йил 17 март куни Африка футбол конфедерацияси (CAF) финал натижаси бўйича берилган апелляцияни қаноатлантирди. Унга кўра, Сенегал терма жамоаси Африка Миллатлар Кубоги ғолиблигидан маҳрум этилди ва чемпионлик унвони Марокашга берилди.
Сенегал терма жамоаси 2026 йил 18 январь куни Рабат шаҳрида бўлиб ўтган финал ўйинида ўз дарвозасига белгиланган пенальтига норозилик сифатида майдонни тарк этгани учун техник мағлубиятга учраган деб топилди. Ўшанда футболчилар 14 дақиқадан сўнг майдонга қайтишган ва қўшимча вақтда Папе Гейнинг голи эвазига 1-0 ҳисобида ғалаба қозонишган эди. Бироқ CAF Апелляция кенгаши ушбу натижани бекор қилиб, Марокаш фойдасига 3-0 ҳисобидаги ғалабани ёзди.
Ушбу қарор турнир тарихидаги энг шов-шувли воқеалардан бирига айланди. Ўйиндаги тартибсизликлар ва мухлислар билан содир бўлган тўқнашувлар Африка футболи нуфузига путур етказганини CAF’нинг ўзи ҳам тан олган эди.
Сенегалнинг кескин эътирози
Сенегал футбол федерацияси (SFF) ушбу қарор устидан Лозаннадаги Спорт арбитраж судига (CAS) шикоят қилишини маълум қилди. Федерация бош котиби Абдулай Сейду Совнинг сўзларига кўра, мазкур қарор ҳеч қандай ҳуқуқий асосга эга эмас.
«Бу ҳақиқий масхарабозлик. Қарор мутлақо асоссиз ва қонунга зид. Судья ишни холис кўриб чиқиш учун эмас, балки юқоридан берилган буйруқни бажариш учун келгани кўриниб тура турибди. Биз чекинмаймиз, ҳақиқат ва қонун Сенегал томонида», — деди у давлат телеканалига берган интервюсида.
Қоидаларга риоя қилиш талаби
Бу қарор Марокаш учун тарихий аҳамиятга эга. Жамоа орадан 50 йил ўтиб, ўз тарихида иккинчи бор қитъа чемпионига айланди. Марокаш қироллик футбол федерацияси апелляциядан мақсад фақатгина мусобақа регламенти ижросини таъминлаш бўлганини билдирди.
CAF регламентининг 82 ва 84-моддаларига кўра, агар жамоа ҳар қандай сабаб билан ҳакам рухсатисиз ўйинни давом эттиришдан бош тартса ёки майдонни тарк этса, у мағлуб деб топилади.
Эслатиб ўтамиз, финалда Конголик ҳакам Жан-Жак Ндала VAR тизимидан сўнг Сенегал дарвозасига пенальти белгилагач, жамоа мураббийи Папе Буна Тиав шогирдларига майдондан чиқиб кетишни буюрган эди. Кейинчалик Садио Маненинг саъй-ҳаракатлари билан футболчилар қайтган, бироқ Марокаш вакили Браҳим Диас пенальтидан унумли фойдалана олмаган эди.
Жарималар ва дисквалификациялар
CAF, шунингдек, Марокаш ҳужумчиси Исмоил Сайбарига қўлланган 100 минг долларлик жаримани бекор қилди ва унинг четлатилишини уч ўйиндан биттага туширди. Аммо Марокаш федерациясининг VAR жараёнига аралашишга уриниши учун белгиланган 100 минг долларлик жарима ўз кучида қолди. Сенегал мураббийи Тиав эса 100 минг доллар жаримага тортилиб, футболдан четлатилган.