2026 йилнинг 1 апрелидан Ўзбекистон қонунчилигида бир қатор муҳим ўзгаришлар амалиётга жорий этилди.
Бензин, сигарет, автомобиль ва кўчмас мулк тўловлари — энди фақат нақд пулсиз
Электр энергияси, табиий газ, ичимлик суви ва қиймати 25 млн сўмдан юқори бўлган товарлар учун тўловлар тўлиқ нақд пулсиз шаклга ўтказилди. Муайян турдаги операциялар учун тўловлар фақат банк карталари ёки электрон тўлов тизимлари орқали қабул қилинмоқда.
Янги талаблар 28 мингга яқин товар позицияларини қамраб олди:
- Алкоголь ва тамаки маҳсулотлари: 22 мингга яқин номдаги маҳсулотлар.
- Ёқилғи қуйиш шохобчалари: нефть-газ маҳсулотлари сотуви ва электромобилларни қувватлантириш хизматлари.
- Транспорт ва уй-жой: ишлаб чиқарилганига 10 йилдан ошмаган 561 турдаги кўчмас мулк ва транспорт воситалари.
- Давлат хизматлари: 56 турдаги турли хизматлар.
- Шунингдек, кўчмас мулк ва M, N, O ҳамда G тоифасидаги транспорт воситалари (янги ва 10 йилгача бўлган) олди-сотдиси бўйича ҳисоб-китоблар энди фақат эскроу-ҳисобварақлари орқали амалга оширилмоқда. Маблағлар сотувчига фақат шартнома нотариус томонидан тасдиқланганидан сўнг ўтказилади.
Чет эллик сайёҳлар учун ҚҚСни қайтариш (tax free)
Мамлакатнинг барча халқаро аэропортларида хорижий фуқаролар учун қўшилган қиймат солиғини қисман қайтариш тизими тўлиқ йўлга қўйилди. Эндиликда ҚҚСни қайтариш учун хариднинг минимал қиймати 1 млн сўм ўрнига 300 минг сўм этиб белгиланди ва товарларнинг чекланган рўйхати бекор қилинди.
Ўзини ўзи банд қилганлар учун ипотека имконияти
Ижтимоий солиқ тўлайдиган ўзини ўзи банд қилган шахслар эндиликда бюджет ресурслари ҳисобидан ипотека кредитларини олишлари мумкин. Субсидия олиш учун мезонларга мувофиқликни текшириш инсон омилисиз, subsidya.idm.uz тизими орқали автоматик тарзда бажарилмоқда.
Давлат тиббиёт муассасалари 5 кунлик иш ҳафтасида
Давлат шифохоналари ва поликлиникалари олти кунлик иш ҳафтасидан беш кунликка ўтказилди. Шанба ва якшанба кунлари тиббий хизматлар навбатчилик асосида ташкил этилмоқда.
ЙҲҚ бузилишлари: камералар ҳам жарима балларини ҳисоблайди
Йўл ҳаракати қоидаларини бузиш учун жарима баллари нафақат инспекторлар, балки кузатув камералари қайд этган қоидабузарликлар учун ҳам ҳисобланмоқда. Агар автомобиль бошқа шахс бошқарувида бўлган бўлса (ишончнома ёки суғурта асосида), баллар бевосита ўша ҳайдовчига ёзилмоқда.
Зўравонликка қарши SOS тугмаси
Ҳимоя ордерини олган аёлларнинг гаджетларига Миллий ижтимоий ҳимоя агентлигининг SOS иловаси ўрнатилмоқда. Тугма босилганда, 5 км радиусдаги ички ишлар ходимлари 10 дақиқа ичида етиб келиши қатъий белгиланди.
Экологик жарималар тизимидаги ўзгариш
Экология соҳасидаги қонунбузарликлар учун жарималар эндиликда ходимларга эмас, балки фақат юридик шахсларга нисбатан қўлланилмоқда.