Ўзбекистон иқтисодиёти ўсиш суръатларини тезлаштирди – 2025 йилнинг 9 ойи якунларига кўра, ЯИМ ўсиши ўтган йилги 6,6%га нисбатан 7,6%га ошди, дейилади Статистика бўйича Миллий қўмитанинг янги чораклик ҳисоботида.
Ўсиш ортида фаол ички талаб, ишлаб чиқариш қувватларининг кенгайиши ва ҳукуматнинг инвестицияларни қўллаб-қувватлаш сиёсати уйғунлиги турибди.
Қайта ишлашдаги ҳаракат
Саноат сектори 6,8%га ўсди, бу 2024 йилги кўрсаткичдан (7%) бироз паст. Соҳанинг ЯИМ ўсишига қўшган ҳиссаси 1,7% пунктига баҳоланмоқда. Ишлаб чиқариш саноати тармоқ маҳсулотининг 85,5%ни ташкил этди. Хомашёни чуқур қайта ишлаш ва тайёр маҳсулот ишлаб чиқариш билан боғлиқ сегментлар – қурилиш материалларидан тортиб полимерлар ва машинасозликкача кенгаймоқда.
Бироқ, тоғ-кон саноати ўсиб бораётган ички талаб ва инфратузилмага киритилаётган инвестицияларга қарамай, камтарона 4% ўсишни кўрсатди. Электр ва газ таъминоти ишлаб чиқариши ҳам ўртача, 6,6%га ўсди.
Нафақат об-ҳаво
Аграр сектор ўтган йилги 3,1%га нисбатан 4,1% ўсишни намойиш этди. Асосий омил – нафақат қулай об-ҳаво шароитлари, балки замонавий агротехнологияларнинг жорий этилиши ва меҳнат унумдорлигининг ошишидир. Пахта етиштириш 20,9% га, дон экинлари – 11,2%га, балиқчилик – 9,3% гаўсди.
Қишлоқ хўжалигининг ЯИМ ўсишига қўшган ҳиссаси 0,6% пунктини ташкил этди, динамиканинг барқарорлиги агросекторнинг босқичма-босқич технологик янгиланган соҳага айланаётганини кўрсатади.
Қурилиш сектори ўсиш етакчиларидан бири бўлди: ўтган йилги 9,1%га нисбатан +14,2%. Унинг ЯИМга қўшган ҳиссаси 1% пункти. Уй-жой, ижтимоий объектлар, йўл ва энергетика инфратузилмасининг фаол қурилиши бошқа тармоқлар учун мультипликатив самара яратмоқда.
Ишларнинг 51% кичик корхоналар ва микрофирмалар томонидан бажарилаётгани тадбиркорликнинг юқори даражада жалб этилгани ва рақобат муҳитининг ривожланаётганидан далолат беради.
Асосий драйвер
Хизмат кўрсатиш соҳаси иқтисодиётнинг локомотиви бўлиб қолмоқда – ўтган йилги 12,8%га нисбатан 14% ўсиш, ЯИМга қўшган ҳиссаси 4% пункти даражасида. Савдо, шу жумладан меҳмонхоналар ва овқатланиш, 10,6%га, транспорт ва алоқа – 14,6%га ўсди. Бу рақамлаштириш самараси ва истеъмолчилик фаоллигининг ўсишини акс эттиради.
Чакана товар айланмаси 11%га ўсди, бунда айнан йирик тармоқлар энг юқори динамикани кўрсатди (+17,8%). Кичик бизнес 9,7%га ўсди, норасмий сектор эса бозорнинг деярли ўндан бир қисмини – 9,8%ни сақлаб қолди.
Расмий статистикада тақдим этилган умумий манзара Ўзбекистон иқтисодиёти таркибий янгиланиш элементлари билан барқарор ўсиш босқичида эканлигини кўрсатади. Ўсиш бир зумлик истеъмолчилик ўсиши ҳисобига эмас, балки диверсификация, инвестициялар ва унумдорликни ошириш ҳисобига шаклланмоқда. Саноат ривожланиши, фаол қурилиш ва хизмат кўрсатиш соҳасининг ўсишининг уйғунлиги 2026 йилда янги суръатларга чиқиш учун барқарор платформа яратмоқда.
