2025 йилда энг кўп коррупциявий жиноятлар Соғлиқни сақлаш, Мактабгача ва мактаб таълими вазирликларида ҳамда маҳаллий ҳокимликларда қайд этилган. Бу ҳақда 2026 йил 6 февраль куни Тошкентда бўлиб ўтган матбуот анжуманида Коррупцияга қарши курашиш агентлиги директори Акмал Бурхонов маълум қилди.
Унинг сўзларига кўра, агар 2024 йилда 5716 та коррупциявий жиноят аниқланган бўлса, 2025 йилда бу кўрсаткич 5222 тани ташкил этган. Шундай қилиб, кўрсаткич 8,6 фоизга камайган.
Агентлик таҳлилига кўра, 2025 йилда ҳудудлар кесимида коррупциявий жиноятлар сони Фарғона ва Сурхондарё вилоятларида ошган. Шу билан бирга, Хоразм, Қашқадарё, Тошкент ва Самарқанд вилоятларида камайиш кузатилган.
«Туман ва шаҳар даражасидаги 12 нафар ҳоким коррупция учун жавобгарликка тортилди, — деди Акмал Бурхонов уларнинг исмларини очиқламасдан. — 300 дан ортиқ [бундай жиноятлар] маҳаллий ҳокимликлар ҳиссасига тўғри келади. Шу билан бирга, уларнинг аксарияти, яъни 80 фоиздан ортиғи ҳоким ёрдамчилари билан боғлиқ. Биз буни ўргандик ва таҳлил қилдик. Ушбу соҳада коррупцияга мойил омиллар жуда кўплиги сабабли, айнан шу ерда бундай жиноятлар кўп содир этилмоқда».
Антикоррупция агентлиги раҳбари, шунингдек, субсидиялар ва имтиёзли кредитларни инсон омили иштирокисиз — ҳоким ёрдамчилари ва «маҳалла еттилиги»га боғланмаган ҳолда ажратиш чоралари кўрилаётганини маълум қилди. Ушбу жараёнларни тўлиқ рақамлаштириш режалаштирилмоқда.
«Ҳисоблайманки, 2026 йилда ҳоким ёрдамчилари томонидан содир этиладиган коррупциявий жиноятлар улушини кескин камайтиришга эришилади», — дея қўшимча қилди Бурхонов.
Унинг сўзларига кўра, ўтган йили ҳокимликлар кесимида энг кўп коррупциявий жиноятлар Тошкент шаҳри (612), Тошкент вилояти (584) ва Фарғона вилоятида (455) қайд этилган.
2025 йилда идора томонидан 673,3 млрд сўмлик 192 та давлат хариди ўрганилганда қонунчилик бузилиши ҳолатлари аниқланган. 14 нафар шахсга нисбатан маъмурий, 12 нафарига нисбатан интизомий жазо чоралари қўлланган, иккита ҳолат бўйича эса жиноят иши қўзғатилган.
2025 йил декабрь ойи охирида Президент Шавкат Мирзиёев коррупцияни мамлакат ривожланишига асосий таҳдид деб атади ва 2026 йилдан бошлаб коррупцияга қарши назоратнинг янги тизимини эълон қилди. У 1 январдан барча идораларда жорий этила бошланди. «Кимки „менинг мансабим, унвоним бор, мени ҳеч ким тегмайди“ деб ўйласа, хато қилади», — дея огоҳлантирди давлат раҳбари.