Тошкент метрополитенининг 13 та бекатида нақд пул тўловлари улуши кескин камайиши сабабли кассаларнинг бир қисми ёпилади, дея хабар берди метрополитен матбуот хизмати. Бугунги кунда йўловчиларнинг атиги 6-7% кассалардан нақд пулга QR-кодли чипталарни харид қилмоқда. Илгари бу кўрсаткич 45-50%ни ташкил этган, дейилади хабарда.
Кассалар «Мирзо Улуғбек», «Халқлар дўстлиги», «Пахтакор», «Ҳамид Олимжон», «Пушкин», «Дўстлик», «Тошкент», «Ойбек», «Тинчлик», «Шаҳристон», «Бодомзор», «Минор» ва «Абдулла Қодирий» бекатларида ёпилади.
Қоғоз чипталарни автоматлаштирилган терминаллардан харид қилиш мумкин бўлади. QR-кодли чипта орқали бир марталик йўл ҳақи 3000 сўм, транспорт ёки банк карталари, шунингдек, мобил иловалар орқали тўланганда эса 1700 сўм.
