2026 йил бошидан буён қуёш ва шамол электр станциялари томонидан ишлаб чиқарилган электр энергияси ҳажми 1 млрд кВт·соатга етди, деб хабар берди Ўзбекистон Энергетика вазирлиги матбуот хизмати.
2025 йилнинг шу даврига нисбатан ишлаб чиқариш ҳажми 400 млн кВт·соатга ёки 40 фоизга ошган.
Ўзбекистонда умумий ўрнатилган қуввати 5582 МВт бўлган 15 та қуёш фотоэлектр станцияси ва 5 та шамол электр станцияси фаолият юритмоқда.
2026 йил бошидан буён қуёш фотоэлектр станциялари 396 млн кВт·соат, шамол электр станциялари эса 604 млн кВт·соат электр энергияси ишлаб чиқарди.
Ишлаб чиқаришнинг ўсиши 267 млн кубометр табиий газни тежаш ва атмосферага 575 минг тоннадан ортиқ зарарли моддалар чиқишининг олдини олиш имконини берди, дейилади хабарда.
Гидроэлектр станцияларининг ишлаб чиқариш ҳажми билан биргаликда жами 1,57 млрд кВт·соат электр энергияси ишлаб чиқарилди. Бу 400 млн кубометр табиий газ тежалишини таъминлади ва 863 минг тоннадан ортиқ зарарли моддалар чиқиндиларининг олдини олди. Вазирлик маълумотларига кўра, ушбу ҳажм 5 млн хонадоннинг ўртача ойлик истеъмолига ёки 625 минг хонадоннинг йиллик истеъмолига мос келади.
Энергетика вазирлиги маълумотларига кўра, 2022 йилда Навоий ва Самарқанд вилоятларидаги қуёш станциялари 434 млн кВт·соат, 2023 йилда — 576,9 млн кВт·соат ишлаб чиқарган. 2024 йилда 9 та қуёш ва 1 та шамол электр станцияси 4,86 млрд кВт·соат энергия берган. 2025 йилда барча қуёш ва шамол электр станцияларининг жами ишлаб чиқариш ҳажми 10,5 млрд кВт·соатга етди, электр энергияси ишлаб чиқаришнинг умумий ҳажми эса 86,7 млрд кВт·соатни ташкил этди.
Энергетика вазири Жўрабек Мирзамаҳмудов аввалроқ янги энергетика қувватларининг ишга туширилиши Ўзбекистонга 2025 йилда электр энергиясининг соф экспортига ўтиш имконини берганини таъкидлаган эди.